Festivali i filmit PriFest

Festivali Ndërkombëtar i Filmit “Prishtina International Film Festival” (PriFest) ka hapur mbrëmjen e djeshme edicionin e 14-të të tij në Kino Armata në Prishtinë, nën moton “Vjosa Forever Prifest”. Hapjes së këtij edicioni i parapriu një performancë artistike dedikuar themelueses dhe drejtoreshës së këtij festivali, Vjosa Berisha, e cila u nda nga jeta në qershor të këtij viti. Në çeljen e këtij festivali, kryetari i Bashkisë së Tiranës, Erion Veliaj vlerësoi kontributin e themelueses së “PriFest”-it Vjosa Berisha. “I premtova që do të merrja pjesë”, është shprehur Veliaj. Në vitin kur Tirana është Kryeqyteti Europian i Rinisë nuk mund të mos mungonim, sepse unë besoj fort që ajo që është një histori suksesi në Prishtinë, është edhe suksesi ynë në Tiranë dhe ajo që është një gjë e bukur në Tiranë, është edhe suksesi i Prishtinës,” tha kryebashkiaku i Tiranës. Pjesë e këtij edicioni do të jetë edhe një program special i festivalit të filmit të Odesës (Odesa International Film Festival). Përgjatë edicioneve të mëparshme PriFilm Fest ka sjellë filmat më cilësorë nga vende të ndryshme, si dhe kineastë, regjisorë e aktorë të famshëm nga vende si Amerika, Australia Britania, e po ashtu nga rajoni ynë. Sivjet po me nismën e Vjosës PriFilm shkon edhe një hap tutje, me Festivalin ndërkombëtar nga Odesa me moton “Përtej Kufijve, Odesa në PriFest”, për shkak të luftës absurde në Ukrainë, po e hap edicionin e vet në Prishtinë në bashkëorganizim me PriFilm Fest. “Miq të dashur të Ukrainës, këtu në Prishtinë jeni në shtëpinë tuaj,” u shpreh kryetari i Bashkisë së Prishtinës, Përparim Rama. Dhjetëra filma shqiptarë dhe të huaj do të shfaqen në disa kategori garuese të këtij festivali që u çel mbrëmë me filmin “Vera andrron detin”. Ndërkohë sot, si dhe në datën 25, janë planifikuar të shfaqen filmat e kategorisë “In Memoriam”, “Cirku Fluturues” dhe “Besim Sahatçiu – jeta dhe vepra” për nder dhe në kujtim të producentes Vjosa Berisha dhe regjisores Burbuqe Berisha.https://ata.gov.al/2022/09/21/nis-festivali-i-filmit-prifest-veliaj-i-premtova-vjoses-se-do-te-merrja-pjese/