“Uniforma Ime”

Projekti i FSHF-së “Uniforma Ime” ka nisur të marrë jetë. Ka nisur shpërndarja e bazës materiale për të gjithë klubet dhe akademitë e futbollit në të gjithë vendit. Që nga e dita e hënë Federata Shqiptare e Futbollit, pasi ishte koordinuar me të gjithë aktorët e futbollit në vend, po furnizon me setin e uniformave përkatëse ekipet e fëmijëve në prag të nisjes së sezonit të ri edhe në kampionatin e moshave. “Uniforma Ime” do të reduktojë ndjeshëm kostot e familjeve shqiptare, që deri më sot kanë harxhuar mbi 23 mijë lekë për t’i siguruar fëmijëve që luajnë futboll uniforma stërvitjeje dhe loje. Këtë e konfirmojnë edhe vetë drejtuesit e akademisë, të cilët vlerësojnë shumë impaktin social të këtij projekti, siç edhe e konfirmon drejtuesi i Akademisë Teuta, Eduard Salillari. “Këtë sezon akademia e Teutës përbëhet nga 450 fëmijë, të cilët këtë vit përfitojnë nga ky projekt i madh i FSHF-së. Duke e krahasuar me vitin e kaluar, ku shuma për një set stërvitjeje ishte rreth 23 mijë lekë për çdo lojtar, është një kosto e konsiderueshme për çdo familje. Kështu që ky projekt do të jetë një ndihmë e madhe për çdo familje që ka fëmijën në ekip futbolli dhe në rastin konkret edhe për klubin e Teutës, që do të heqë një barrë financiare për të gjithë”. “Madje, që në momentin e lançimit të projektit nga FSHF në muajin korrik ne kemi pasur efekt, pasi janë shtuar fëmijët që duan të bëhen pjesë e akademisë. Është një ndihmë e madhe që po na jep FSHF, duke nisur që nga topat falas e tashmë me uniformat e lojës e stërvitjes falas”, – thotë Salillari për Fshf.org gjatë procesit të tërheqjes së bazës materiale. Edhe përfaqësuesi i klubit të Skënderbeut, Enea Zhidro, thotë se nisma lehtëson ndjeshëm barrën financiare që kishin prindërit, të cilët kanë fëmijë në ekipe futbolli. “Kemi marrë sot në dorëzim setin e uniformave për të gjitha ekipet tona të moshave. Një projekt shumë i rëndësishëm i Federatës Shqiptare të Futbollit që ndihmon klubet dhe akademitë e futbollit, jo thjeshtë në aspektin estetik, por sidomos në aspektin financiar. Në lidhje me akademinë tonë, që sponsorizon uniformat për ekipet është një ndihmë e madhe financiare, por kryesisht është ndihmë e madhe financiare për prindërit, të cilët i kanë besuar trajnimin e fëmijëve të tyre akademisë tonë. Të ardhura financiare që mund t’i përdorin për nevoja të tjera. Ne kemi 335 fëmijë të regjistruar në kampionate rajonale dhe profesioniste. Dua të falënderoj Federatën Shqiptare të Futbollit, që është fokusuar shumë te futbolli i fëmijëve me anë të projekteve të ndryshme dhe investimeve në infrastrukturë, në edukimin e trajnerëve apo kualifikimin e burimeve njerëzore, investimeve në bazën materiale si edhe ndryshimet e fundit në strukturën e garave të moshave, që janë për t’u përshëndetur”, – thotë Zhidro në prononcimin e tij. Procesi i shpërndarjes së uniformave ka nisur tashmë dhe të gjitha klubet dhe akademitë po e tërheqin bazën materiale në bashkëpunim me përfaqësuesit e Federatës Shqiptare të Futbollit.https://sport.rtsh.al/artikull/-uniforma-ime-fshf-nis-shperndarjen-e-bazes-materiale-falas