“Koko Fest”

Komedia “Pak Pakt” me autor dhe regji të Ledian Gjeçit u shfaq mbrëmjen e djeshme në kuadër të edicionit të 9-të të Festivalit Mbarëkombëtar të Komedisë “Koko Fest”, që po zhvillohet nga 3-10 shtator në Korçë. Artdashësit korçarë duartrokitën interpretimin e aktorëve aktorëve Ermir Hoxha, Xhuliano Brisku, Mehmet Xhelili, Ledjon Zoi, Gëzim Rudi, Alba Shtëmbari, Margent Caushi. Komedia me autor dhe regji të Ledian Gjeçi, kostumografi të Sofi Kara, skenografi të Beqo Nanaj dhe kompozitor Jetmir Mehmeti trajton dramën e ikjes së rinisë, e braktisjes së vendit për një jetë më të mirë, e cila është një problematikë e thekshme e shoqërisë tonë. Në komedi flitet për dy djem shqiptarë të shkolluar mirë, por thellësisht të varfër e të mbytur në borxhe, të cilët i kap policia në flagrancë duke tentuar të ikin jashtë shtetit në mënyrë ilegale. Shpresa e tyre e vetme për një jetë më të mirë shkatërrohet totalisht. Por, vjen dikush dhe iu ofron djemve një pakt me të cilin ata mund të dalin nga burgu dhe mund të përfitojnë dokumente në çdo shtet evropian, vetëm nëse deklarojnë publikisht sikur janë homoseksualë. Kjo komedi është shpallur fituese e fondit të krijimtarisë për të rinj në zhanrin dramaturgji nga “Qendra Kombëtare e librit dhe leximit për vitin 2021″. Natën e sotme në skenën e Teatrit “Andon Zako Çajupi” do të ngjitet trupa e teatrit “Migjeni”, Shkodër, me komedinë e zezë “Gjaja” të autorit Xho Orton. Me regji të Altin Bashës në këtë komedi interpretojnë Nikolin Ferketa, Pjerin Vlashi, Krist Lleshi, Jozef Shiroka, Simon Shkreli dhe Fritz Selmani. Në edicionin e 9-të të “Koko Fest” marrin pjesë edhe Teatri “Aleksandër Moisiu” i Durrësit, Teatri “Bekim Fehmiu” Prizren, Teatri “Andon Zako Çajupi” Korçë, Teatri “Migjeni”, Shkodër, Teatri “Skampa” Elbasan dhe Teatri i Tetovës. Në përfundim të festivalit do të ndahen edhe çmimet.http://ata.gov.al/2022/09/07/koko-fest-teatri-kombetar-eksperimental-shfaq-komedine-pak-pakt/