Mbajmë të pandryshuar çmimin e energjisë

Ministrja e Financave dhe Ekonomisë, Delina Ibrahimaj prezantoi sot në Komisionin Parlamentar të Ekonomisë dhe Financave, aktin normativ për rishikimin e buxhetit të vitit 2022. Ministrja deklaroi sot se rishikimi i buxhetit, ka si synim kryesor shtrirjen e financimit të paketës së parë të ndihmës për konsumatorët, me qëllim përballimin e mëtejshëm të pasojave të rritjes së çmimeve të konsumit, nëpërmjet alokimit sërish të një fondi kontigjencë për “Paketën e Rezistencës Sociale” ndaj pasojave të krizës, me kosto 6.1 miliardë lekë. “Ndryshimet e propozuara do të shërbejnë për sigurimin deri në fund të vitit 2022 të qëndrueshmërisë së parametrave kyç makrofiskale, krahas orientimit të burimeve financiare drejt mbështetjes së shtresave më vulnerabël dhe politikave prioritare”, tha Ibrahimaj. Përmes ndërhyrjes, tha Ibrahimaj, rriten me rreth 13 miliardë lekë shpenzimet e përgjithshme, të cilat pas kësaj, arrijnë në nivelin 660.7 miliardë lekë, nga 647.7 miliardë lekë që ishin. “Mundëson një rritje të totalit të shpenzimeve me rreth 13 miliard lekë, kryesisht për të amortizuar goditjen e çmimeve. Më konkretisht, në këtë AN janë alokuar fonde për paketa ad-hoc të ndihmës sociale për të lehtësuar impaktin e rritjes së çmimeve, sigurisht tek shtresat më në nevojë të shoqërisë. Janë alokuar fonde për të kompensuar pjesërisht kostot shtesë në inputet kryesore të investimeve publike, vijimi i të cilave është mjaft i rëndësishëm për mbajtjen vitale të ekonomisë, si në afatin e shkurtër dhe në afatin e mesëm”, tha ministrja. Ministrja informoi edhe se është duke u hartuar një plan, i cili synon një mbështetje më të qëndrueshme me afat të mesëm, duke qenë se parashikohet që kriza të zgjasë. “Fokusi ynë janë pensionistët dhe personat me aftësi të kufizuar, ku sfida jonë mbetet përballimi i rritjes së çmimit të energjisë”, deklaroi Ibrahimaj. Në aktin normativ janë parashikuar 1.67 miliardë lekë për kompensimin financiar të çmimit për disa materiale ndërtimi, sipas përcaktimeve në kontratat publike për punë, si pasojë e situatës së veçantë të krijuar në treg gjatë vitit 2022. “Ky fond, i cili alokohet në buxhetin e MFE, do të përdoret me VKM bazuar në kërkesat e argumentuara të institucioneve përkatëse dhe vetëm pas ezaurimit të mundësive të financimit brenda tavanit buxhetor 2022 të miratuar përcdo institucion”, sqaroi ministrja. Në aktin normativ parashikohet rritje me 4 miliardë lekë e shpenzimeve kapitale me financim të huaj. Nga ana tjetër, 1.72 miliardë lekë do të shkojnë për subvencionimin e qirasë për familjet e prekura nga tërmeti, pas ezaurimit të tavanit prej 1 miliard lekë të planifikuar për vitin 2022. Ndërsa 1.2 miliardë lekë do të shkojnë për blerjen e teksteve shkollore falas dhe për mbulimin e shpenzimeve të transportit për mësuesit dhe nxënësit. Ministria ka alokuar një shtesë prej 48 milionë lekësh si transfertë, përkatësisht për arsimin parashkollor 38 milionë lekë, dhe për mbrojtjen nga zjarri dhe shpëtimi 10 milionë lekë. Po ashtu, shtesë në masën 10 milionë lekë si transfertë e pakushtëzuar të përgjithshme për mbulimin e shpenzimeve të veprimtarive dhe të funksioneve të njësive të vetëqeverisjes vendore që nuk kanë realizuar mjaftueshëm nivelin e të ardhurave. “Në këndvështrimin e parametrave makroekonomikë, ky akt normativ parashikon një rritje ekonomike reale prej 3.2%. Përmes këtij akti normativ reduktohet deficiti buxhetor dhe huamarrja e brendshme neto me 17 miliardë lekë, duke e ulur atë në nivelin 84 miliardë lekë nga 101 miliardë lekë që është aktualisht. Rrjedhimisht, në përqindje të PBB-së, ky nivel i rishikuar i deficitit ulet në nivelin 4.2%, nga 4.5% që rezultoi në vitin 2021”, u shpreh ministrja.http://ata.gov.al/2022/09/06/ibrahimaj-mbeshtesim-pensionistet-mbajme-te-pandryshuar-cmimin-e-energjise/