Kukësi përmbyset në shtëpi nga Kastrioti

Kastrioti shtang Kukësin në shtëpi. Krutanët kanë arritur të marrin një fitore 2-1 në këtë javë të tretë të Superiores falë një goli të shënuar nga Mehmeti në minutën e 90-të të takimit. Një ndeshje e luftuar nga të dyja skuadrat, me verilindorët që kanë shënuar të parët, por më pas kanë provuar shijen e hidhur të përmbysjes. Një sfidë që nisi e mirë për të besuarit e trajnerit Gega, të cilët ishin të pafat në minutën e 17-të kur topi u ndal në shtyllë. Megjithatë, edhe krutanët provuan të bëjnë lojën e tyre duke u shfaqur rrezikshëm në disa moment, por pjesa e parë u mbyll me rrjeta të paprekura. Në pjesën e dytë Kukësi shfaqet më kërkues dhe në minutën e 61-të arrin të gjejë rrugën e rrjetës me anë të Zivkoviç. Por avantazhi verilindorëve nuk do të zgjasë shumë pasi krutanët arrijnë të barazojnë në minutën e 69-të me anë të Prenkoçeviç. Pas këtij momenti skuadra e Kukësit, në kërkim të golit të avantazhit, la shumë hapësira duke u dhënë mundësi krutanëve që të shfaqeshin rrezikshëm. Kur dukej se gjithçka do të mbyllej në barazim, vjen dhe goli i fitores për krutanët me një goditje nga jashtë zone të Mehmetit, i cili shtang Kukësin dhe i dhuron tri pikë skuadrës së tij. Mbyllet 2-1 për Kastriotin.https://sport.rtsh.al/artikull/kukesi-permbyset-ne-shtepi-nga-kastrioti