45 mijë vizitorë në muzeun “Gjergj Kastrioti Skënderbeu”

Muzeu “Gjergj Kastrioti Skënderbeu” në Krujë ka shënuar një fluks të lartë vizitorësh nga janari derë në fund të muajit gusht. Drejtori i Muzeut Historik dhe Etnografik Krujë, Mehdi Hafizi, tha sot për ATSH-në se “nga janari deri në fund të gushtit muzeu “Gjergj Kastriot Skënderbeu” u vizitua nga 45 mijë vizitorë. Ndërsa vetëm në muajin gusht nga mbi 10 000 vizitorë, duke kaluar numrin e vizitorëve të së njëjtës periudhë para pandemisë (gusht 2019)”. “Turistët që vizituan muzeun janë kryesisht të huaj nga Spanja, Izraeli, Shtetet e Bashkaura të Amerikës, Egjipti, Danmarka, Polonia, Suedia etj. Po ashtu një numër të lartë kanë shënuar edhe shqiptarët e diasporës”, tha Hafizi. Sipas tij, të shumtë kanë qenë edhe turistët që kanë ardhur me kroçera dhe anije turistike në portin e Durrësit dhe më pas kanë vizituar Krujën. Muzeu Kombëtar “Gjergj Kastrioti Skënderbeu” u përurua më 1 nëntor 1982 në kështjellën e Krujës. Ky muze ka edhe karakterin e një memoriali që trajtohet si kullë shqiptare e Veriut. Kompleksi i muzeut është shpërndarë në disa hapësira, të cilat vizitohen kronologjikisht sipas ngjarjeve. Në këtë muze ndodhen objekte që i përkasin periudhave të ndryshme historike, por në disa pavijone trajtohet historia e Mesjetës së Hershme, principatat shqiptare, pushtimi osman dhe betejat e shqiptarëve për të përballuar këtë pushtim.https://ata.gov.al/2022/09/02/hafizi-per-atsh-45-mije-vizitore-ne-muzeun-gjergj-kastrioti-skenderbeu/