Në Manastirin e Ardenicës

Në Manastirin e Ardenicës në Lushnjë po vijon puna për të përmirësuar pjesën e sheshit në hyrje të destinacionit më të frekuentuar nga turistët vendas dhe të huaj. Drejtuesi politik i Partisë Socialiste në qarkun e Fierit, Taulant Balla ndau sot në rrjetet sociale pamje nga punimet që po kryhen në këtë monument kulture. Manastiri i Ardenicës është një ndër pasuritë më të vyera dhe të vizituara në të gjithë qarkun e Fierit. Ai ngrihet në majën e një kodre të lartë, në një pozicion mjaft piktoresk. Manastiri përmban disa faza ndërtimi, më e vjetra duhet t’i përkasë periudhës bizantine. Ai ka formën e një trekëndëshi, me sipërfaqe prej rreth 2500 m2. Kisha e Shën Mërisë, në brendësi të Manastirit, përmban afreske të mrekullueshme të vëllezërve Kostandin dhe Athanas Zografi. Manastiri është një monument kulture mjaft tërheqës për turistët e vizitorët, si për shkak të interesit kulturor që paraqet, ashtu edhe për pozicionin gjeografik dhe bukurinë natyrore mjaft të veçantë të vendit ku ndodhet.https://ata.gov.al/2022/08/30/punime-per-permiresimin-e-infrastruktures-ne-manastirin-e-ardenices/