Spanja, kampione e Botës për here të parë

Spanja është kampione e Botës për herë të parë për moshën deri në 20 vjeç për femra. Gjithçka ka ndodhur në Kosta Rika në evenimentin që erdhi drejtpërsëdrejti në rrjetin e Radio Televizionit Shqiptar, ndërsa Spanja vendos emrin në librin e artë të trofeve të këtij Botërori. Pra pas Gjermanisë dhe Shteteve të Bashkuara të Amerikës me tre trofe, Koresë së Veriut me dy trofe dhe Japonisë me një trofe, vjen Spanja, e cila ka meritën e madhe që ka shkurorëzuar kampionen në fuqi, që në këtë rast ishin japonezët. Spanja e ka zgjidhur finalen në 27 minutat e para. E kjo pas golit të Gabarraos dhe dopjetës së Ajingonos. Sapo ka nisur pjesa e dytë ka ardhur goli i Japonisë, me Amanon, por vetëm kaq, sepse Spanja tashmë e kishte ngritur trofeun. Madje një pjesë e mirë e këtyre lojtareve, të cilat sot janë Kampione të Botës për moshën deri në 20 vjeç, dy muaj më përpara ishin Kampione Europe për moshën deri në 19 vjeç në atë finale të fituar 2-1 me Norvegjinë. Në vendin e tretë Brazili, që falë golave të Konsanit, dos Santos de Lima dhe Gi Fernandez mundi Holandën, 4-1. Kështu me Spanjën kampione Bote ul siparin gara e 20-vjeçareve femra për t’ia lënë hapësirën aktiviteteve të tjera ndërkombëtare, sigurisht në rrjetin e Radio Televizionit Shqiptar.https://sport.rtsh.al/artikull/spanja-kampione-e-botes-per-here-te-pare