Hilmi Mustafa, fotografi i eventeve sportive

Muaji kushtuar fotografisë shqiptare vijon me një foto që ministrja e Kulturës, Elva Margariti, ka përzgjedhur nga fondi i Muzeut “Marubi”. Ministrja Margariti ka risjellë punën e fotografit Hilmi Mustafa, i njohur ndryshe si fotografi i eventeve sportive. Një tjetër shkodran që çoi përpara mjeshtrinë e fotografisë, Hilmi Mustafën e kujtojmë me këtë foto nga një ndeshje futbolli, e vitit 1970. Hilmi Mustafa lindi në Shkodër, më 1934. Rreth viteve 1957-58 mori mësimet e para si fotograf nga djali i xhaxhait, në studion fotografike “Liria” në Durrës. Më 1961-62, me t’u kthyer në Shkodër, hyri në Ndërmarrjen e Riparim-Shërbimeve tashmë për të punuar si fotograf i shtetit. Aty u njoh me Gegë Marubin, Pjetër Rraboshtën, Shan Picin, Angjelin Nenshatin, Lazër Kodhelin e të tjerë fotografë e specialistë të zhvillimit të fotografisë. Filloi të fotografonte seminaret, ligjëratat dhe aktivitetet e ndryshme të veprimtarisë së Universitetit. Me pasionin për sportin, ai do të shndërrohej shumë shpejt në fotografin e aktiviteteve sportive. Vdiq në vitin 2022. Fondi i tij i ruajtur në Fototekën “Marubi”, numëron mbi 200 poza të shkrepura në film.