Lollobrigida kandidon për në Senat

Diva e kinemasë, Gina Lollobrigida, e cila i ka mbushur 95 vjeç, ka ndërmend të kandidojë për një vend në senatin italian në zgjedhjet e përgjithshme të 25 shtatorit. “Jam e lodhur duke dëgjuar politikanët që zihen me njëri-tjetrin, pa iu shtruar punës ndonjëherë”, u shpreh ajo në një intervistë të publikuar sot në gazetën “Corriere della Sera”. “Italia është në gjendje të keqe, dua të bëj diçka të mirë dhe pozitive”, tha aktorja e njohur. Karriera e saj në kinematografi arriti kulmin në vitet 1950, me filmat e saj më të famshëm, përfshi “Beat the Devil” (1952) dhe “The Hunchback of Notre Dame” (1956). Lollobrigida dëshiron të garojë në zgjedhje si pjesë e listës së kandidatëve, që përfshin edhe Partinë Komuniste. Ajo shtoi se para se të merrte vendimin kishte folur edhe me avokatin e saj. Lollobrigidës i është caktuar nga gjykata një kujdestar pas një mosmarrëveshjeje të gjatë me familjarët e saj dhe për pasojë nuk i lejohet të vendosë e vetme lidhur me asetet e saj. Lolobrigida tentoi të niste një karrierë politike në vitin 1999, kur kandidoi për t’u bërë anëtare e Parlamentit Europian, por nuk mundi të siguronte numrin e duhur të votave. Italia do të zgjedhë një parlament të ri në shtator, pas rrëzimit të qeverisë së Mario Draghit në fund të korrikut.http://ata.gov.al/2022/08/15/lollobrigida-kandidon-per-ne-senatin-italian/