“DokuFest”-250 filma në Prizren

Në Prizren po zhvillohet edicioni i 21-të i festivalit ndërkombëtar të filmit dokumentar dhe të shkurtër,“DokuFest”. Prizreni është shndërruar në destinacion për filmdashës, kineastë e vizitorë të shumtë nga vende të ndryshme. Shfaqja e filmave në kinematë e hapura të qytetit ofron një eksperiencë fantastike, shumë të veçantë-thuhet në njoftimin online të Ministrisë së Kulturës, Rinisë e Sporteve, të Kosovës Hapja zyrtare e festivalit u bë mbrëmë në Kino Lumbardhi, ndërsa tema e këtij edicioni është “Si të mbijetojmë?”, duke dashur t’u japë përgjigjje shumë pyetjeve ekzistenciale. Të pranishëm në këtë ngjarje ishin zëvendëskryeministrja e Republikës së Kosovës, Donika Gervalla, zëvendësministrja e MKRS, Daulina Osmani, ish-presidentja e Republikës së Kosovës, Atifete Jahjaga, ambasadorë, regjisorë e artdashës. Në edicionin e 21-të, “DokuFest” ofron një program të pasur me më shumë se 250 filma, diskutime e mbrëmje muzikore. Në kinemanë “Lumbardhi” do të shfaqen 108 filma garues nga 58 shtete në këto kategori: “Balkan Dox”, “International Feature Dox”, “International Short Dox”, “International Shorts”, “Human Rights Dox”, “Green Dox”, “Truth Dox” dhe “National”. Filmat garues do të vlerësohen nga një juri e veçantë profesionale për secilën kategori.