Sot është Dita Botërore e Kafshëve Ujore dhe kremtohet si e tillë prej vitit 2020, për të rritur ndërgjegjësimin për kafshët e egra që jetojnë brenda ose pranë ujit. Hapësirat ujore përfshijnë oqeane, dete, lumenj, liqene, përrenj, rezervuarë, ligatina dhe zona të tjera ujore në planetin tonë. Dhe kafshët ujore nuk janë vetëm peshqit, oktapodët, balenat dhe delfinët, por edhe arinjtë polarë, pinguinët, zogjtë e detit, zvarranikët, amfibët dhe më shumë.
Kjo ditë përqendrohet rreth njerëzve, në mënyrë që të marrin kohë për të mësuar dhe për të njohur rëndësinë e të gjitha krijesave që shtëpinë e tyre e kanë në ujë.
Për shkak se njerëzit nuk jetojnë nën ujë, është e lehtë të harrohet grupi i madh dhe shumëllojshmëria e kafshëve ujore. Pavarësisht dallimeve mes tyre, këto kafshë i bashkon fakti se meritojnë të vihen re dhe të vlerësohen.
Rëndësia e kafshëve ujore nuk është kuptuar plotësisht nga shumica e njerëzve. Këto kafshë krijojnë ekosisteme nënujore që janë vendimtare për botën. Ata ndikojnë për një jetë të shëndetshme në planet, dhe po u ofrojnë njerëzve burime që përdoren në jetën e përditshme. Me kalimin e viteve, konsumi i kafshëve të ujit është rritur dhe ekziston frika se mund të humbasim disa nga speciet. Por nuk është vetëm mbikonsumi që i kërcënon.
Ngrohja globale dhe ndotja kanë gjithashtu një ndikim të madh në kafshët e ujit.
Një nga rreziqet kryesore për kafshët e ujit është peshkimi i atyre llojeve që nuk janë për konsum njerëzor. Këto lloje gjallesash që ngecin në rrjetat e anijeve të peshkimit, vërtet hidhen përsëri në oqeane dhe dete, por ata hidhen të ngordhur ose të plagosur. Gjithashtu, pajisjet që përdorin anijet e peshkimit shpesh përfundojnë në ujë, gjë që është vdekjeprurëse për kafshët e ujit dhe për shkëmbinjtë koralorë.
