Trump kërkon pafajësinë për katër akuzat për krime zgjedhore

Ish-presidenti amerikan, Donald Trump kërkoi pafajësinë për katër akuza federale në lidhje me akuzat se ai ishte përfshirë në një komplot shumëplanësh për të përmbysur vullnetin e votuesve dhe për të qëndruar në pushtet, pavarësisht humbjes së zgjedhjeve të vitit 2020 duke rezultuar në një sulm të paprecedentë në Capitol Hill. Trump u paraqit para gjykatëses së magjistraturës, Moxila Upadhyaya në gjykatën amerikane ”E Barrett Prettyman” në Uashington, DC, afër vendit ku rebelët sulmuan fillimisht oficerët e policisë dhe rrëzuan barrierat në lëndinën perëndimore të Capitol-it, më 6 janar 2021. Upadhyaya e informoi Trumpin për maksimumin e dënimeve për secilën nga katër pikat: komplot për të mashtruar SHBA, komplot për të penguar një procedim zyrtar, komplot kundër të drejtave dhe pengim ose përpjekje për të penguar një proces zyrtar. Trump, i cili udhëtoi nga Bedminster, Nju Xhersi, u shoqërua nga këshilltari i tij ligjor, John Lauro dhe Todd Blanche, me të cilët fliste herë pas here. Por kryesisht ish-presidenti u ul i qetë, me duar të mbledhura, ndërsa priste që të fillonte procesi i shkurtër në sallën e gjyqit 22. Ai tundi kokën kur emri i çështjes u lexua me zë të lartë. Prokurori i posaçëm, Jack Smith u ul në rreshtin e parë të tre bankave ku rrinin gazetarët, stafin dhe anëtarët e publikut. Zona përreth gjykatës ishte e qetë. Një ditë më parë, Capitol-i kaloi orë të tëra i mbyllur, pasi një telefonatë sugjeroi se kishte një sulmues në një ndërtesë zyre të Senatit. Forcat e rendit më vonë raportuan se asnjë incident i tillë nuk kishte ndodhur pas pastrimit të zonës.