Shenjimi i shtigjeve në zonat e mbrojtura i vjen në ndihmë vizitorëve vendas e të huaj, që i vizitojnë ato në të gjitha stinët e vitit. Punonjësit e Administratës së Zonave të Mbrojtura Kukës, në kuadër të përmirësimit të infrastrukturës turistike në zonat e mbrojtura kanë shenjuar shtegun turistik “Ura e Topojanit-Ujëvara e Topojanit” brenda Parkut Natyror “Korab-Koritnik”.
“Ky shteg është lehtësisht i aksesueshëm me një gjatësi rreth 520 m dhe vizitohet shumë nga vizitorët për shkak të ujëvarës që ndodhet në fund të shtegut, e cila është një ndër atraksionet e shumta turistike që ka parku natyror Korab-Koritnik”, theksoi AdZM Kukës. Bukuria e rrallë e parkut kombëtar Korab-Koritnik, në Kukës, tërheq çdo vit edhe më shumë turistë vendas dhe të huaj që pëlqejnë natyrën e virgjër, sportet dimërore dhe alpinizmin.
Parku natyror Korab-Koritnik përshkohet nga një rrjet i dendur hidrik i liqeneve dhe përrenjve, të cilët derdhen në degët e Drinit. Për shkak të karakterit gërryes në basenet e lumenjve dhe përrenjve në zonë janë krijuar lugina e kanione si Gryka e Vanajve, Kanioni i Bicajve, luginat e Lumës, Bushtricës, Veleshicës dhe Gramës.
