Shkodër, bllok banesash sociale për familjet në nevojë

Ndërtimi i një blloku banesash sociale është një prej projekteve të afërta që do të realizohet në Shkodër, nga Enti Kombëtar i Banesave në bashkëpunim me bashkinë, e cila ka vënë në dispozicion hapësirën për ndërtimet. Kryetari i bashkisë së Shkodrës, Benet Beci, drejtori i përgjithshëm i EKB-së, Stefan Çipa dhe drejtoresha e Zyrës Rajonale të Entit, Eva Luli, inspektuan zonën ku do të ngrihen ndërtesat sociale që do të shërbejnë për strehimin e familjeve në nevojë, si dhe për shërbimet komunitare. Në fjalën e tij Çipa tha se “falë bashkëpunimit të filluar mes Entit kombëtar të Banesave me bashkinë e Shkodrës do të fillojmë në këtë zonë urbane ndërtimin e banesave sociale me kosto të ulët. Do të fillojmë sa më shpejt për të ndërtuar banesën e parë me 6 kate në Shkodër e pastaj për të vazhduar me banesa të tjera”. Kryebashkiaku Beci theksoi se kemi bërë gati të gjithë dokumentacionin dhe vendin që po e inspektojmë sot. Është prioritet për bashkinë, pasi duhet të zgjidhet problemi i strehimit të pastrehëve”. “Janë dy modele, një godinë me 6 kate dhe një me 8 kate, që janë aplikuar. Është shumë e rëndësishme që katet e para të përdoren për nevoja sociale si kopshtet. Shpresojmë të vazhdojmë me shpejtësi zbatimin e këtyre banesave sociale”, tha Beci. ATSH