Serbia u tërhoq nga plani për djegien e Jarinjës

Zëvendëskryeministri për integrim evropian, zhvillim dhe dialog i Republikës së Kosovës, Besnik Bislimi, deklaroi se dje Serbia nuk i ndaloi huliganët serbë por u tërhoq nga plani për djegien e Jarinjës. Përmes një reagimi në rrjetet sociale, Bislimi tha se intensiteti i sulmeve hibride të Serbisë dhe Rusisë ndaj Republikës së Kosovës është rritur ndjeshëm. “Grafiku i punuar nga institucionet e sigurisë, që pasqyron vetëm krizën e djeshme në Jarinjë, tregon qartë edhe aktorët e përfshirë dhe autorin e vërtetë, Putinin. Ka pasur plan ruso-serb, që dje të digjej pika kufitare e Jarinjës”, shkroi Bislimi. Ai tha se ky plan u parandalua nga institucionet e Republikës së Kosovës, mekanizmat e sigurisë, në bashkëpunim me partnerët perëndimorë, me amerikanët. “Pavarësisht se policia e Serbisë, dje u shfaq duke i ndaluar huliganët që mos ta djegin Jarinjën, ky quhet vetëm një akt tërheqjeje nga ana serbe, duke e parë se një gjë e tillë do t’iu dështonte”, vijoi Bislimi. Ai tha se siç e ka Serbia aleat Rusinë e Kinën, Kosova e ka aleat Perëndimin dhe SHBA-në. “Ata përfaqësojnë agresionin, ne përfaqësojmë lirinë”, përfundoi Bislimi. https://ata.gov.al/2022/12/19/bislimi-serbia-u-terhoq-nga-plani-per-djegien-e-jarinjes/