Eksportet drejt Greqisë kanë njohur rritje të ndjeshme gjatë 6 muajve të parë të këtij viti. Sipas raportit të tregtisë së jashtme të publikuar nga Instituti i Statistikave, eksportet llogariten gati 14 miliardë lekë, nga rreth 10 miliardë lekë që ishin në të njëjtën periudhë të një viti më parë. Vlerën më të lartë të eksporteve e shënuan grupet “materiale ndërtimi dhe metale”, vlera e të cilit llogaritet 3.2 miliardë lekë, ndjekur nga grupi “tekstile dhe këpucë” vlera e të cilit llogaritet gati 3 miliardë lekë. Ndërkohë, importet e mallrave nga Greqia në Shqipëri, gjatë periudhës janar-qershor arritën 33.3 miliardë lekë, kur një vit më parë (2021) u importuan 27 miliardë lekë. Në vlerën e mallrave të importuara nga shteti fqinj, vendin kryesor e zënë grupi i mallrave “ushqim, pije dhe duhan” në vlerën 9.1 miliardë lekë, i ndjekur nga grupi “materiale ndërtimi dhe metale”, në vlerën 5.9 miliardë lekë dhe grupi “minerale, lëndë djegëse, energji elektrike”, në vlerën 5.5 miliardë lekë. Referuar të dhënave, shkëmbimet tregtare të Shqipërisë me Greqinë gjatë 6-mujorit zunë 6.8 % të totalit të gjithë tregtisë./https://ata.gov.al/2022/07/18/rriten-eksportet-drejt-greqise-kryesojne-materialet-e-ndertimit-dhe-tekstilet/
- Advertisment -