Putin: Rusia do të vazhdojë zhvillimin e kapaciteteve bërthamore

Rusia do të vazhdojë të zhvillojë forcat e saj bërthamore, u zotua sot presidenti Vladimir Putin, një ditë përpara përvjetorit të pushtimit të Rusisë në Ukrainë. “Si më parë, ne do t’i kushtojmë vëmendje të shtuar forcimit të kapaciteteve bërthamore”, tha Putin në një fjalim të botuar nga Kremlini për Ditën e Mbrojtësit të Atdheut. Putin ngriti mundësinë e fillimit të vendosjes së raketës së re balistike ndërkontinentale ”Sarmat” këtë vit, e cila mund të armatoset me koka bërthamore. Megjithatë, kjo fillimisht ishte planifikuar për vitin 2022. ”Përveç kësaj, prodhimi serial i raketës ‘Kinshal’ do të vazhdojë dhe do të fillojë dorëzimi masiv i raketave hipersonike ‘Zircon”, tha Putin. “Një ushtri dhe marinë moderne, e aftë janë garantues të sigurisë dhe sovranitetit të një vendi”, tha lideri 70-vjeçar. Udhëheqësi i Kremlinit ka folur vazhdimisht për një kërcënim nga NATO, duke argumentuar për shembull se aleanca e mbrojtjes synon të mposhtë Rusinë si një fuqi bërthamore në luftën e nisur prej tij në Ukrainë. Rusia pezulloi zyrtarisht traktatin e çarmatimit bërthamor New START me SHBA, pasi tensionet midis dy vendeve janë të larta për mbështetjen e Uashingtonit për Ukrainën. Analistët ushtarakë ndërkombëtarë kanë vënë në dukje problemet masive të pajisjeve ruse në luftën e saj kundër Ukrainës.atsh