Projekti Qëndrueshmëria ndaj Ndryshimeve Klimatike dhe Zhvillimi i Bujqësisë, i financuar nga Banka Botërore dhe që zbatohet nga Ministria e Bujqësisë dhe Zhvillimit Rural, është në hapat e parë të rrugëtimit të tij. BB bën të ditur se, Ballkani Perëndimor konsiderohet një nga rajonet e Europës, ku ndryshimet klimatike do të prekin ndjeshëm sektorët e bujqësisë dhe të energjetikës. Për të reduktuar pasojat Banka Botërore planifikon disa projekte, ndër të cilat ai për “Qëndrueshmëri ndaj Ndryshimeve Klimatike dhe Zhvillimin e Bujqësisë në Shqipëri”. Përmes këtij projekti parashikohet të investohet në disa sektor me qëllim rritjen e konkurrencës dhe qëndrueshmërinë klimatike të zinxhirëve të vlerave prioritare agro-ushqimore. Projekti përbëhet nga tre komponentët të cilët do të mbështesin objektivin e projektit: Promovimin e bujqësisë së zgjuar klimatike dhe aksesin në tregje; Rritjen e përputhshmërisë me standardet e sigurisë dhe cilësisë së ushqimit dhe forcimin e kapaciteteve të analizës së bazuar në dëshmi të MBZHR dhe komunave. Zbatimi i këtij projekti do të zgjatë për një periudhë 60-mujore dhe rezultatet e pritura nga investimet e kryera do të jenë: rritja e ofertës/shitjeve për bizneset vendase agroushqimore; rritja e produktivitetit dhe prodhimit bujqësor, kosto më e ulët dhe sezoni i zgjatur i prodhimit; përmirësimi i gjurmueshmërisë, integrimi i fermerëve në treg dhe përputhshmëria me kërkesat për sigurinë dhe cilësinë e ushqimit; vendimmarrje të bazuar në prova për elasticitet dhe sisteme të qëndrueshme agroushqimore.
