Presheva, Bujanoci e Medvegja me mbi 122 mijë banorë

Një ditë pasi ka përfunduar regjistrimi i popullsisë dhe ekonomive familjare në Serbi, kanë filluar të dalin edhe rezultat e para paraprake. Për shqiptarët në tri komunat e Luginës së Preshevës, në Preshevë, Medvegjë e Bujanoc, më të rëndësishme sesa shifrat për të dhënat e tjera, janë ato për numrin e banorëve. Kështu, bazuar në rezultatet paraprake, rezulton se në këto tri komuna, jetojnë 122 mijë e 58 banorë, e ku siç dihet, pjesa dërmuese e tyre janë shqiptarë, raporton RTKlive. Kështu, në Preshevë janë regjistruar 59 mijë e 24 persona, në Bujanoc 54 mijë e 529 dhe në Medvegjë, 8 mijë e 505 banorë. Serbia ka kryer regjistrimin e popullsisë edhe në vitin 2011, por në atë kohë, shqiptarët e kishin bojkotuar këtë proces, duke bërë që në Luginë të evidentohen vetëm rreth 5 mijë banorë, kryesisht serbë. Kjo ka bërë që edhe Qeveria në Serbi, bazuar në statistika, të kryejë edhe investime dhe projekte shumë të pakta në këtë rajon. Gjithashtu, si pasojë e numrit shumë të ulët të banorëve, duke u bazuar në atë regjistrim, edhe gjykatat janë transferuar në Vranjë, duke e vështirësuar jetesën e qytetarëve.https://www.rtklive.com/sq/news-single.php?ID=621692