Pas disa dekadash stanjacioni, kërkimet më në fund po përparojnë në luftën kundër kancerit të pankreasit, një nga kanceret më vdekjeprurëse.
Ndërsa një kurë mbetet e pakapshme për shumicën e pacientëve, këto rrugë të reja premtojnë të shtojnë muaj të çmuar në jetën e tyre.
“Po shfaqet një ndryshim i vërtetë për këtë kancer, i cili nuk kishte parë asnjë përparim mjekësor për 40 vjet”, tha biologu Patrick Mehlen, një studiues në Qendrën e Kancerit ”Léon Bérard” në Lion.
”Për rreth 10 vjet, ka pasur më shumë fonde dhe për këtë arsye më shumë interes nga studiuesit”, vazhdoi ai, duke shtuar se ky kancer “po prek gjithnjë e më shumë të rinj dhe ne nuk e kuptojmë plotësisht pse”.
Ky përshpejtim po fillon të japë fryte kundër një kanceri që mbetet veçanërisht vdekjeprurës, shpesh diagnostikohet vonë dhe është shumë rezistent ndaj trajtimit.
Shifra të ndryshme në Shtetet e Bashkuara dhe Francë vlerësojnë se pas pesë vitesh, afërsisht një në 10 persona të diagnostikuar me kancer të pankreasit është ende gjallë.
Duke pasur parasysh numrin në rritje të rasteve dhe natyrën shumë agresive të kancerit të pankreasit, disa studime parashikojnë se ai do të bëhet shkaku i dytë kryesor i vdekjes nga kanceri në vendet e zhvilluara në vitet e ardhshme, pas kancerit të mushkërive.
Megjithatë, disa njoftime të fundit ofrojnë një perspektivë më premtuese.
Këto njoftime janë rezultat i hulumtimeve në faza të ndryshme të zhvillimit dhe duke përdorur qasje të shumëfishta terapeutike.
Lajmi më i habitshëm, i mirëpritur nga shumë onkologë, u botua në mesin e prillit nga startup-i farmaceutik amerikan ”Revolution Medicines”.
Kompania raportoi rezultate dukshëm pozitive për një molekulë të quajtur daraksonrasib.
Kjo molekulë synon një proteinë të pranishme në disa kancere, veçanërisht kancerin e pankreasit, e cila nxit ndarjen e pakontrolluar të qelizave.
U testua te pacientët, kanceri i të cilëve tashmë kishte përhapur metastaza, në krahasim me kimioterapinë konvencionale, e cila ka një mekanizëm veprimi shumë më pak të synuar.
Gjysma e pacientëve të trajtuar me daraksonrasib – një trajtim i marrë nga goja – mbijetuan për më shumë se 13 muaj, dy herë më gjatë se grupi që merrte kimioterapi.
Progresi mund të duket i vogël, por për këtë sëmundje dhe në këtë fazë, është i pashembullt.
