Përmbytjet në Evropën Qendrore

Një numër rekord përmbytjesh, qindra rrëshqitje dheu dhe gjashtë vdekje u raportuan nga Evropa Qendrore, ndërsa ekipet e shpëtimit u përballen sot me motin ekstrem në Slloveni, Austri dhe Kroaci. Përmbytjet shënuan fatkeqësinë më të keqe natyrore që Sllovenia ka përjetuar ndonjëherë që nga pavarësia e saj në 1991. Kryeministri Robert Golob, duke vlerësuar dëmin total në më shumë se 500 milionë euro (548.3 milionë dollarë), u bëri thirrje Bashkimit Evropian dhe NATO-s për ndihmë. Kancelari gjerman Olaf Scholz njoftoi ndihmën për Slloveninë nga Agjencia Federale Gjermane për Ndihmën Teknike (THW). “Gjermania po ndihmon dhe po dërgon vullnetarë të THW sa më shpejt që të jetë e mundur me kërkesën e Sllovenisë,” shkroi Scholz në Twitter. Gjashtë persona humbën jetën si pasojë e motit ekstrem, sipas autoriteteve, duke përfshirë dy holandezë që u goditën nga rrufeja gjatë ecjes. Zjarrfikësit e Sllovenisë regjistruan 57 operacione të dielën mbrëma, kryesisht në veri të vendit. “Që nga e premtja, pas shiut të dendur, brigjet e lumenjve Sava, Drava dhe Mura shpërthyen dhe liqenet vërshuan”, njoftoi agjencia e lajmeve STA. Përmbytjet dhe rrëshqitjet e dheut shkaktuan dëme të mëdha, duke shkaktuar evakuimin e fshatrave, ndërsa rrugët dhe shinat e trenave u zhytën në ujë. “Qeveria gjermane po dërgon grupe pune nga 10 shoqata të ndryshme për të ndihmuar homologun e saj anëtar të BE-së, Slloveninë”, tha sot në Berlin zëvendëszëdhënësja e qeverisë Christiane Hoffmann. Zyra e Jashtme e Gjermanisë gjithashtu ra dakord të dërgonte një ndihmë me vlerë 700,000 euro (778,000 dollarë).