Parku Kombëtar Divjakë – Karavasta është një nga zonat më të rëndësishme të biodiversitetit të Shqipërisë dhe brigjeve të Mesdheut.
I shtrirë si një hark i gjelbër anës detit Adriatik, ky park ndodhet rreth 5 km larg qytetit të Divjakës dhe afro 70 km larg Tiranës dhe përbëhet nga ekosisteme të pasura në biodiversitet, burime natyrore, një zonë e mbrojtur natyrore për shpendët e ujit, si ligatinë, me interes dhe rëndësi ndërkombëtare.
Parku kufizohet nga lumi Shkumbin në veri, nga kodrat e Divjakës në Lindje, nga kanali i Myzeqesë dhe lumi Seman në jug, dhe laget nga deti Adriatik në perëndim.
Pranë këtij parku gjenden ishulli i Kularit, Laguna e Karavastasë, Lagunat e Godullës së Madhe dhe të Vogël, Godulla e Pishës.
Karavastaja dhe mjediset ujore rreth saj janë habitate për disa lloje peshqish si ngjala, koca, levreku, qefulli etj. Ndërkohë pjesë e parkut janë edhe monumentet natyrore si: Ishulli i Pelikanit; Dunat e oazit të Divjakës; Pisha e Egër në oazin e Divjakës; Gorrica e Kryekuqit; Vidhat e Zharnecit, etj.
