Ndërsa Izraeli feston Ditën e Përkujtimit, kryeministri Benjamin Netanyahu tha se ”lufta në Gaza është një betejë për mbijetesën e Izraelit”. “Lufta ka të bëjë me faktin ose ne, Izraelin, ose ata, përbindëshat e Hamasit”, tha ai gjatë një ceremonie të Ditës Përkujtimore në malin Herzl, ku ndodhen varrezat kryesore ushtarake të Izraelit. “Ose ekzistencë, liri, siguri dhe prosperitet ose zhdukje, masakër, përdhunim dhe nënshtrim”, shtoi ai. Shtatë muaj pas sulmit të paprecedentë të Hamasit ndaj Izraelit dhe përgjigjes së egër ushtarake të Izraelit në Gaza, Netanyahu u zotua se Izraeli është “i vendosur ta fitojë këtë betejë” dhe se armiku “do të vazhdojë të paguajë një çmim të lartë për veprimet e tij”. ”Një fitore ndaj Hamasit do të nënkuptonte sjelljen e të gjithë pengjeve në shtëpi. Një fitore e tillë do të siguronte ekzistencën dhe të ardhmen tonë”, shtoi ai.
