Ndërhyrje nga ajri për shuarjen e zjarrit në fshatin Bukmirë në Mirditë

Helikopteri i Forcës Ajrore sapo i është bashkuar aksionit për shuarjen e flakëve në fshatin Bukmirë në Mirditë, ku zjarri ka marrë përmasa të mëdha. Ministri i Mbrojtjes, Niko Peleshi publikoi sot në rrjetet sociale momente nga ky aksion, ndërsa shtoi se forcat zjarrfikëse nga Mirdita, Tirana, Kukësi e Burreli janë duke punuar nga terreni. “Dyshimet janë se si në Krujë ashtu edhe në Mirditë zjarret janë të qëllimshme. Policia po punon për identifikimin e tyre dhe sipas ligjit të gjithë autorët do të ndëshkohen”, tha ministri Peleshi. Qendra Kombëtare Operacionale e Emergjencave Civile në AKMC raportoi se gjatë 24 orëve të fundit janë shënuar 23 vatra zjarri në vend, ndërsa në operacione për shuarjen e tyre janë angazhuar 327 forca operacionale, të Shërbimit të Mbrojtjes nga Zjarri dhe Shpëtimi, Forca të Armatosura, forca bashkiake, forca policore, punonjës të Administratës së Zonave të Mbrojtura, shërbimi pyjor, forca vullnetare dhe 25 mjete zjarrfikëse.https://ata.gov.al/2022/08/07/peleshi-nderhyrje-nga-ajri-per-shuarjen-e-zjarrit-ne-fshatin-bukmire-ne-mirdite/