NATO diskuton marrëdhëniet me Ukrainën dhe shpenzimet për mbrojtjen

Ministrat e Jashtëm të NATO-s takohen sot jozyrtarisht në Oslo për të diskutuar shpenzimet për mbrojtjen dhe për marrëdhëniet e ardhshme të aleancës me Ukrainën. “Çdo sulm i ri rus me dronë dhe raketa vetëm sa do të na bëjë të mbështesim edhe më shumë ukrainasit në vetëmbrojtjen e tyre”, tha ministrja e Jashtme gjermane, Annalena Baerbock përpara bisedimeve. Mbledhja është një tjetër hap në koreografinë diplomatike përpara samitit të liderëve të NATO-s në Vilnius, e planifikuar për më 11-12 korrik, që synon të nxisë marrëveshjen se si të forcohen lidhjet me anëtaren aspirante Ukrainën. NATO ka shfaqur unitet përballë agresionit rus kundër Ukrainës, por ende nuk ka gjetur gjuhën e përbashkët për t’i dhënë vendit të pushtuar një rrugë drejt pranimit. ”Aleanca duhet të rrisë ndihmën humanitare dhe gjithashtu ushtarake për Ukrainën”, tha ministrja e Jashtme norvegjeze, Anniken Huitfeldt përpara takimit të sotëm duke anashkaluar çështjen. Vështirësi paraqesin edhe trazirat e fundit në Kosovë. NATO do të dërgojë 700 trupa shtesë për të mbështetur 3 800 trupat tashmë në vend, pasi 30 trupa të forcave mbrojtëse u plagosën në përleshjet me militantët serbë. Një çështje tjetër që zvarritet është pranimi i Suedisë në aleancën 31-anëtarëshe, pasi bëri një kthesë historike drejt NATO-s, pas pushtimit të Ukrainës nga Rusia. Ndërsa Hungaria dhe Turqia vazhdojnë të bllokojnë ofertën e Suedisë për t’u anëtarësuar në NATO, Stokholmi shpreson se ligjet e reja kundër terrorizmit, të miratuara së fundmi, do të qetësojnë presidentin turk Recep Tayyip Erdogan, i rizgjedhur të dielën. Huitfeldt i kërkoi Turqisë dhe Hungarisë të avancojnë çështjen. atsh