Musk heq nga ndërtesa e kompanisë logon “X” të rrjetit social 

Struktura e ndritshme me simbolin “X” e vendosur mbi ndërtesën e selisë së Twitter-it të riemëruar tashmë “X”, u hoq vullnetarisht nga kompania, pas paralajmërimit të inspektorëve të ndërtesave në San Francisko, se do e largonin ata nëse një gjë e tillë nuk do bëhej prej kompanisë. Simboli i rrjetit social të Elon Musk u hoq rreth tre ditë pasi ishte instaluar. Logoja “X” kishte një ndriçim tepër të lartë gjatë natës, gjë që irritoi banorët e zonës, të cilët iu ankuan autoriteteve. Zyrtarët e qytetit thanë se kishin hapur një ankesë dhe po hetonin instalimin e tabelave. Sipas tyre, vendosja e një tabele në majë të një ndërtese kërkon leje për arsye projektimi dhe sigurie. Musk, prezantoi një javë më parë logon e re të platformës sociale. Ai tha se dëshiron të krijojë atë që njihet si “super aplikacion”, i quajtur “X“, i ngjashëm me apikacionin kinez WeChat që lejon përdoruesit të kryejnë funksione të shumta nga mesazhet deri te porositja e një taksie dhe pagesa e faturave. RTSH