Zëvendëskryeministrja, njëherësh shefja e diplomacisë së Kosovës Donika Gërvalla ka deklaruar se nuk është surprizë moszbatimi i marrëveshjes me Serbinë për dokumente. Ajo tha se beteja me Serbinë është e gjatë dhe nuk përfundon për dy ditë. Para medieve ka folur edhe për deklaratën e Listës Serbe se presidentja Vjosa Osmani është e padëshirueshme në veri të vendit. Gjatë Kuvendit Zgjedhor të partisë Guxo, Gërvalla deklaroi se Lista Serbe nuk e përcakton se ku shkon presidentja e vendit. “Nuk është ndonjë surprizë që Serbia nuk e zbaton marrëveshjen. Por ju lutem respektoni faktin se sot jemi mbledhur për një qëllim të caktuar. Beteja me Serbinë është e gjatë, beteja me Serbinë nuk përfundon për dy ditë”, tha ajo. Donika Gërvalla tha se nuk marrin leje për të vizituar komunat veriore. “Për fat të mirë nuk e përcakton Lista Serbe se ku shkon presidentja e këtij vendi. Ku shkon dhe çfarë bën e kanë përcaktuar qytetarët e këtij vendi dhe jo një parti e caktuar politike, e cila pjesërisht është e drejtuar nga forca kriminale në veri. Ne nuk marrim leje për të vizituar vendin tonë”, ka shtuar ajo. Ajo nuk është prononcuar kur është pyetur se a do të jetë ajo, kryetarja e re e vendosur nga delegatët e Kuvendit zgjedhor. Gërvalla tha se deklarimet për largimin e deputetes Doarsa Kica-Xhelili në LDK janë thashetheme. Largimin e deputetes nuk e ka komentuar as kryeministri Albin Kurti, i cili më herët në Kuvend ka uruar shumë suksese për partinë Guxo.http://ata.gov.al/2022/09/07/gervalla-lista-serbe-nuk-mund-tia-ndaloje-viziten-osmanit-ne-veri/
- Advertisment -