Liqeni i Kallabakut, ndalesa e shumë vizitorëve vendas dhe të huaj në verë, tashmë është plotësisht i ngrirë. Përgjatë kësaj periudhe liqeni me pamje mahnitëse në të gjitha stinët ka marrë ngjyrat e dimrit dhe tërheq mjaft vizitorë, dashamirës të natyrës që kërkojnë dëborën dhe mundësi për të shijuar dimrin. Liqeni i Kallabakut është një ujëmbledhës me sipërfaqe rreth 7 ha, i pozicionuar mes pyjeve të përbërë nga ahu, bredhi, mështekna etj. Dimri vjen i ashpër në këtë zonë dhe peizazhet janë fantastike, ndërsa disa bujtina aty rrotull mbledhin vizitorët me ngrohtësinë e sobës me dru dhe kuzhinën tradicionale.
