Korça është një ndër rajonet me prodhim më të lartë të qepës, kjo për faktin e kushteve klimatike që favorizon një prodhim të bollshëm dhe cilësor. Vitin që shkoi prodhimi i qepës nga fermerët e Qarkut Korçë ishte i mbarë dhe është shitur gjithë sasia e kultivuar. Një ndër faktorët kyç që ka ndikuar në këtë fakt, ka qenë përzgjedhja e farës cilësore për mbjelljen e qepës duke sjellë më pas një produkt me cilësi të lartë dhe fitime të kënaqshme për fermerët. Fermerët po tregojnë interes për disa varietete farash të importuara nga Holanda, të gjeneracionit F1 të cilët veç të tjerash, janë kultivarë të hershëm dhe japin prodhim në pikun e sezonit turistik, kur ky produkt ka konsum të gjerë si dhe është më rezistentë në kushtet e motit në dimër. Agronomi shprehen se, kërkesa e tregut vendas por e dhe atij për eksport ka qenë më e lartë se sasia e prodhuar. Qepa është një kulturë që mbillet masivisht në fushën e Maliqit dhe gjatë vitit 2023 me të është mbjellë një sipërfaqe prej mbi 700 ha tokë. Zonat më potenciale ku prodhohet janë fshatrat në njësitë Pirg e Pojan.
