Qytetarët shqiptarë do të mund të qëndrojnë drejt Kinës, pa pasur nevojën e marrjes së një vize, siç ka funksionuar deri tani. Kryeministri Edi Rama informoi se pas 30 ditësh marrëveshja për lëvizjen e lirë të qytetarëve shqiptarë në Kinë mes dy vendeve, do të hyjë në fuqi. “Pas 30 ditësh Kina hapet pa viza për shqiptarët”, bëri të ditur kryeministri në rrjetet sociale. Marrëveshja për heqjen reciproke të vizave ndërmjet Shqipërisë dhe Kinës u firmos ditën e sotme nga zëvendësministrja për Evropën dhe Punët e Jashtme të Shqipërisë, Megi Fino dhe ambasadori kinez në Shqipëri, Zhou Ding. Qeveria shqiptare vendosi në mbledhjen e zhvilluar më 27 dhjetor të vitit 2022 miratimin në parim, të marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës Popullore të Kinës, për heqjen reciproke të vizave për mbajtësit e pasaportave të zyrtarëve publikë dhe të pasaportave të zakonshme. Vendimi u miratua në parim nga Këshilli i Ministrave, si propozim i Ministrisë për Europën dhe Punët e Jashtme. ATSH
- Advertisment -