Finlanda ka mbyllur sërish kufirin e saj me Rusinë pasi hapi për një kohë të shkurtër dy vendkalime. “Kufiri lindor do të mbyllet përsëri plotësisht nga e premtja në orën 20:00 deri më 14 janar”, njoftoi sot qeveria finlandeze. Finlanda mbylli gradualisht pikat kufitare për fqinjin e saj lindor Rusinë në nëntor. Në javët para kësaj, roja kufitare finlandeze kishte regjistruar një rritje të madhe të numrit të azilkërkuesve, kryesisht nga Lindja e Mesme, të cilët kishin udhëtuar nga Rusia pa dokumentet e nevojshme dhe kishin aplikuar për azil në Finlandë. Finlanda ka akuzuar Rusinë se i ka futur qëllimisht këta migrantë në kufirin e BE-së dhe vendit anëtar të NATO-s, me qëllim që t’i shkaktojë probleme vendit. Kremlini e ka mohuar këtë pretendim. Transmetuesi finlandez Yle raportoi se më shumë se 70 azilkërkues mbërritën në vendkalimet kufitare Vaalimaa dhe Niirala pasi ato u hapën të enjten. “Kjo është një shenjë se autoritetet ruse po vazhdojnë operacionin e tyre hibrid kundër Finlandës. Kjo është diçka që Finlanda nuk do ta tolerojë”, tha ministrja e Brendshme, Mari Rantanen. Finlanda ndan një kufi prej 1340 kilometrash me Rusinë. Pas disa dekadash mosangazhimi ushtarak, vendi i BE-së u bë anëtar i NATO-s në prill në vazhdën e luftës së agresionit të Rusisë kundër Ukrainës.
