Trajneri i Kombëtares shqiptare U-21, Alban Bushi doli sot në një konferencë për mediet, në kuadër të ndeshjes kualifikuese të “Euro 2025”, ndaj Malit të Zi (7 qershor, ora 20:00) dhe sfidës miqësore ndaj Lihtenshtajnit (11 qershor, ora 19:00). Trajneri i kuqezinjve nën 21 vjeçarë komentoi listën e 23 lojtarëve të grumbulluar, si edhe deklaroi që është i lumtur për ftesën e Simon Simonit dhe Medon Berishës në listën paraprake të Kombëtares A për Kampionatin Evropian. “Në radhë të parë jam i kënaqur me lojtarët që kam në dispozicion për të dyja ndeshjet me Malin e Zi dhe Lihtenshtajnin. Simoni ka qenë pjesë e ekipit A gjatë disa seancave stërvitore, ndërsa Berisha është për herë të parë. Kemi pasur bindje që do të shkonte shumë herët në ekipin A por shkoi më herët se sa pritej. Për ne ka qenë lojtar deciziv, me personalitet dhe ftesa është më se e merituar. Kur e kam kontaktuar për herë të parë i premtova shiritin e kapitenit. Ja premtova sepse shihja që kishte shumë personalitet në fushën e lojës, ishte një lider dhe e meritoi plotësisht. Unë i uroj shumë urime dhe shpresoj që ta kemi në ndeshjen tonë me Malin e Zi”, tha Bushi.
