Ministria e Financave dhe Ekonomisë nxorri për konsultim draftin e Programit të Reformave Ekonomike 2023 – 2025. Programi i Reformave Ekonomike përgatitet çdo vit nga Qeveria nën bashkërendimin kombëtar të Ministrisë së Financave dhe Ekonomisë dhe dorëzohet te Komisioni Evropian, në kuadër të angazhimeve që rrjedhin nga statusi që Shqipëria gëzon si vend kandidat për anëtarësim në Bashkimin Evropian. Dokumenti i ERP paraqet një vështrim të kuadrit makroekonomik dhe fiskal si dhe listën e reformave strukturore parësore për periudhën afatshkurtër, që synojnë nxitjen e konkurrueshmërisë dhe rritjen gjithëpërfshirëse. Në draftin e publikuar përfshihet kapitulli i reformave strukturore parësore të propozuara në draft ERP 2023-2025 dhe zbatimi i udhëzimeve të politikave të BE-së për Shqipërinë. Reformat e propozuara janë në përputhje me dokumentet strategjike kombëtare dhe rajonale, dokumentet kyçe në procesin e anëtarësimit të Shqipërisë në BE, dhe Konkluzionet e Përbashkëta të Dialogut Ekonomik dhe Financiar me BE-në. Ato synojnë të adresojnë pengesat kryesore në fusha të ndryshme, siç janë: menaxhimi i financave publike; transformimi dixhital; tranzicioni i gjelbër; kërkim, zhvillim dhe inovacion; energjia; transporti; bujqësia, industria dhe shërbimet; edukimi dhe aftësitë; punësimi dhe tregu i punës; mbrojtja sociale; kujdesi shëndetësor; integrimi ekonomik; dhe mjedisi i biznesit dhe informaliteti. Nisur nga rëndësia e Programit të Reformave Ekonomike, Ministria e Financave dhe Ekonomisë po ndërmerr një konsultim të gjerë të dokumentit dhe fton organizatat e shoqërisë civile, partnerët për zhvillim, shoqatat e biznesit, dhomat e tregtisë dhe industrisë, partnerët socialë, si dhe aktorë të tjerë të marrin pjesë në këtë proces.https://ata.gov.al/2022/12/20/mfe-nxjerr-per-konsultim-draftin-e-programit-te-reformave-ekonomike-2023-2025/
- Advertisment -