Britania e Madhe dënoi lëshimin e fundit të raketës balistike nga Koreja e Veriut, duke e quajtur atë një “shkelje të qartë” të rezolutave të shumta të Këshillit të Sigurimit të Kombeve të Bashkuara. “Ky raund i përsëritur i testimit është thellësisht i dëmshëm për stabilitetin rajonal dhe kërcënon më tej paqen dhe sigurinë në Gadishullin Korean”, theksoi zëdhënësi i ministrisë së Jashtme Britanike në një deklaratë. ”Britania i kërkon fuqimisht Koresë së Veriut të përmbahet nga lëshimet ilegale, të kthehet shpejt në dialog dhe të braktisë programet e saj bërthamore dhe raketore balistike në një mënyrë të plotë, të verifikueshme dhe të pakthyeshme”, shtoi ai. Koreja e Jugut dhe Japonia thanë se ”Koreja e Veriut lëshoi një raketë balistike të klasit të ndërmjetëm, e para e këtij lloji këtë vit, e cila fluturoi rreth 1,000 kilometra (621 milje) përpara se të ulej në ujërat midis Gadishullit Korean dhe Japonisë”. Koreja e Veriut nga ana e saj tha se ”kishte testuar me sukses një raketë balistike me rreze të mesme veprimi (IRBM) me lëndë djegëse të ngurtë” Lëshimi thuhet se ”shënoi testin e parë ndonjëherë të një IRBM hipersonik me karburant të ngurtë”.
