Dëftesat dhe certifikatat printohen nga e-Albania

Këtë vit për herë të parë, u mundësua që prindërit të tërheqin dëftesat e fëmijëve të tyre përmes platformës e-Albania, pa e pasur të nevojshme të paraqiten fizikisht në institucionet arsimore. Përmes një postimi në rrjete sociale ministrja e Arsimit dhe Sportit, Evis Kushi thekson se tashmë dëftesat e nxënësve apo certifikatat e notave për maturantëve mund të printohen direkt nga sistemi, sa herë që të jetë e nevojshme. “Jemi krenarë që këtë vit arritëm ta përmbushim me sukses angazhimin tonë që si certifikatat e notave të maturës, ashtu dhe dëftesat e nxënësve për çdo vit shkollor në sistemin parauniversitar, të printohen nga platforma e-Albania sa herë që dëshironi, pa qenë nevoja të drejtoheni fizikisht në institucionet arsimore”, tha Kushi. Gjithashtu ministrja bën me dije se janë lehtësuar procedurat edhe për ata që u duhet diploma jashtë vendit. “Përveç kësaj, të gjithë ata të cilëve u duhen këto dokumente për jashtë vendit, janë lehtësuar edhe nga procedura e mëparshme për vulë legalizimi në QSHA, por drejtohen vetëm në Ministrinë për Evropën dhe Punët e Jashtme për vulën apostile”, tha Kushi. atsh