Agjencia Evropiane e Hapësirës i ka quajtur gjetjet “alarmante”. Rreth 40 për qind e blloqeve të akullit të Antarktidës janë tkurrur ndjeshëm gjatë 25 viteve të fundit, paralajmëruan shkencëtarët.
Sipas studimit të botuar në revistën Science Advances, 71 nga 162 blloqet e akullit të Antarktidës humbën masën nga 1997 deri në vitin 2021, nga të cilat 68 prej tyre postuan një reduktim “statistikisht domethënës”.
Shkencëtarët thanë se humbjet shkuan përtej luhatjeve normale të blloqeve të akullit dhe shtuan provat se si ndryshimet klimatike të shkaktuara nga njerëzit po ndikojnë në Antarktidë.
Agjencia Evropiane e Hapësirës (ESA) i ka quajtur gjetjet “alarmante”.
Blloqet e akullit të Antarktidës nuk tregojnë “asnjë shenjë rikuperimi”. Shkencëtarët pas studimit thonë se ndryshimet që po shohin nuk janë në përputhje me luhatjet normale në masën e blloqeve të akullit.
“Ne prisnim që shumica të kalonin nëpër cikle tkurrjeje të shpejtë, por jetëshkurtër, dhe më pas të rriteshin ngadalë”, tha autori kryesor Benjamin Davison, studiues në Universitetin e Leeds.
“Në vend të kësaj, ne shohim se pothuajse gjysma e tyre po tkurren pa asnjë shenjë rikuperimi.”
Gjatë periudhës së studimit, shkencëtarët zbuluan se 29 blloqe akulli fituan masë dhe 62 nuk ndryshuan ndjeshëm.
Shkencëtarët thanë se 48 nga blloqet e akullit kishin humbur më shumë se 30 për qind të masës së tyre gjatë periudhës 25-vjeçare.
Një nxitës kryesor i shkrirjes ishin rrymat e oqeanit dhe erërat në anën perëndimore të Antarktidës, duke shtyrë ujin e ngrohtë nën raftet e akullit.
Shkrirja e akullit të Antarktidës shkakton rritjen e nivelit të detit.
Blloqet e akullit janë platforma lundruese akulli që rrethojnë kontinentin Antarktik, duke ndihmuar në mbrojtjen dhe stabilizimin e akullnajave të rajonit duke ngadalësuar rrjedhën e tyre në oqean.
Një bllok i madh akulli shkrihet duke lëshuar ujë të ëmbël në oqean, gjë që mund të ketë efekte të dëmshme në qarkullimin e oqeanit, tha ESA, imazhet e radarëve satelitorë të së cilës u përdorën në studim.
Të dhënat fillestare të publikuara muajin e kaluar treguan se akulli i detit që mbush oqeanin rreth Antarktidës ka arritur nivele të ulëta rekord këtë dimër, duke shtuar frikën e shkencëtarëve se ndikimi i ndryshimeve klimatike në polin jugor po rritet.
‘Fletët’ e akullit të Antarktidës së bashku me Grenlandën ruajnë rreth dy të tretat e të gjithë ujit të freskët në Tokë, sipas NASA-s.
Uji i shkrirë që vjen nga këto shtresa akulli është përgjegjës për rreth një të tretën e rritjes mesatare globale të nivelit të detit që nga viti 1993.
