Ministrja e Shëndetësisë dhe Mbrojtjes Sociale, Ogerta Manastirliu dhe ministrja e Turizmit dhe Mjedisit, Mirela Kumbaro shpërndanë sot certifikatat e para të rojave bregdetare për 30 studentët e Universitetit të Sporteve, të cilët janë trajnuar dhe certifikuar nga Qendra Kombëtare e Urgjencës Mjekësore. “Qendra Kombëtare e Urgjencës Mjekësore, në bashkëpunim me Universitetin e Sporteve dhe nën drejtimin e Ministrisë së Turizmit dhe Mjedisit dhe të Ministrisë së Shëndetësisë dhe Mbrojtjes Sociale, tashmë kanë lidhur një bashkëpunim, i cili do të jetë i qëndrueshëm, sepse kualifikimi i rojave bregdetare është një ndër aspektet që garanton sezon turistik të sigurt. Plazhet bëhen më të sigurta duke pasur roje bregdetare të cilat janë të certifikuara. Janë rreth 900 studentë që i janë bashkuar thirrjes së shpallur dhe sot kemi 30 studentët e parë të cilët janë certifikuar si roja bregdetare”, – tha ministrja Manastirliu. Duke e konsideruar një garanci të shtuar sigurie certifikimin e rojave bregdetare, Kumbaro tha se me vendimin e fundit të Këshillit të Ministrave, do të lejohet ndërhyrja ndaj operatorëve që nuk e zbatojnë prezencën për vrojtuesit, duke iu hequr të drejtën e menaxhimit të plazhit. “Është një treg në rritje, se tashmë janë operatorët ata që, për të tërhequr klientelën, i thonë kemi dhe shezlong, kemi dhe restorant, po kemi dhe vrojtuesin e plazhit në stacionin tonë, që është garanci për juve. Dhe e kemi të vendosur me ligj dhe ne e kontrollojmë tani. Kemi bërë dhe një ndryshim në vendimin e Këshillit të Ministrave që ndërhyrja jonë ndaj operatorëve që nuk e zbatojnë prezencën e rregulluar me një kontratë pune për vrojtuesit, u ndërpritet atyre kontrata e stacionit të plazhit”, – tha Kumbaro. Në kuadër të planit të masave për një sezon turistik të sigurtë, ministrja Manastirliu bëri me dije dhe hapjen e qendrave shëndetësore verore. “Ne do të hapim, ashtu sikurse kemi bërë çdo vit, 29 qendra shëndetësore verore në të gjithë bregdetin, por edhe në zonat malore, në të cilët do të ofrojnë shërbime për pushues, turistë vendas dhe të huaj, me rreth 160 mjekë dhe infermierë”, – tha Manastirliu. Trajnimi dhe certifikimi i rojave bregdetare është kryer falë bashkëpunimit ndërinstitucional, me një program dhe praktikë reale, për mënyrën se si duhet vepruar në rastet emergjente në plazhe. Të pranishëm në aktivitet ishin edhe prof. Agron Kasa, rektor i Universitetit të Sporteve të Tiranës dhe prof. dr. Ferdinand Mara, dekan i Fakultetit të Veprimtarisë Fizike dhe Rekreacionit, Universiteti i Sporteve të Tiranës, të cilët e kanë konsideruar këtë bashkëpunim shumë të rëndësishëm për studentët. Përgatitja dhe certifikimi i rojave bregdetare përmes këtij bashkëpunimi, do të jetë një proces në vijim, për të rritur sigurinë në plazhe përgjatë sezonit veror. atsh
- Advertisment -