Parlamenti Evropian votoi sot në favor të tre ligjeve për mbrojtjen e klimës, të konsideruara kyçe për arritjen e objektivave të bllokut për reduktimin e emetimeve. Ligjvënësit e Bashkimit Evropian në Strasburg mbështetën një reformë të Sistemit të Tregtimit të Emisioneve (ETS), skema e çmimit të karbonit të BE-së, e cila detyron sektorët me ndotje të lartë si centralet dhe industritë të marrin leje zyrtare për emetimet e tyre të karbonit. Sipas reformës, numri i lejeve do të reduktohet më shpejt se sa ishte planifikuar për të nxitur reduktimin ose shmangien e emetimeve të gazeve serrë. Lejet pa një miratim zyrtar do të hiqen gradualisht deri në vitin 2034. Transporti, karburantet për transportin rrugor dhe ngrohja e ndërtesave do t’i shtohen sektorëve që duhet të paguajnë për ndikimin e tyre ndaj klimës. Parlamenti Evropian mbështeti gjithashtu legjislacionin për të trajtuar të ashtuquajturën ‘lëvizja e karbonit’ kur prodhuesit e zhvendosin prodhimin në vendet me kufizime më të lehta emetimi. Importuesit e produkteve që mbulohen nga ETS, si disa metale ose energji elektrike, duhet të paguajnë diferencën midis çdo çmimi të karbonit të paguar në vendin e prodhimit dhe çmimit të karbonit të BE-së. Kjo tarifë e karbonit, e cila do të vendoset në faza midis 2026 dhe 2034, synon të mbrojë kompanitë evropiane nga ndikimet e rregullave të rrepta në BE dhe të stimulojë mbrojtjen e klimës jashtë vendit. Ligjvënësit e BE-së gjithashtu mbështetën një fond, me vlerë rreth 86 miliardë euro (94 miliardë dollarë) për të mbështetur konsumatorët dhe bizneset e vogla ndërsa BE-ja kalon nga karburantet fosile në energjinë e rinovueshme.
