Anijet e peshkimit në Durrës nuk lejohen në det deri në përmirësimin e motit

Autoriteti Portual i Durrësit bëri të ditur se tragetet që operojnë me linjën Durrës-Bari dhe anasjelltas, kanë mbërritur në Portin e Durrësit sipas parashikimeve, ndërsa anijet e peshkimit ende nuk lejohen të kryejnë aktivitetin e tyre. Autoriteti informoi se nisjet mbrëmjen e kaluar nga të dyja anët e Adriatikut janë bërë më herët se parashikimi, me qëllim mbërritjen më herët në Portin e Durrësit/Barit, kjo si rrjedhojë e masave të marra nga autoritetet detare dhe njoftimit për rritjen e forcës së detit, erës dhe lartësisë së dallgëve në det të hapur. Anijet e peshkimit nuk kanë vijuar aktivitetin e tyre deri në një urdhër të dytë për përmirësim të kushteve të motit. “Nisur nga moti i paqëndrueshëm që ka përfshirë gjirin e Durrësit, në Portin e Durrësit janë marrë të gjitha masat për sigurimin e anijeve që ndodhen të akostuara në kalatat portuale”, bëri të ditur APD. Sipas APD-së, përmirësimi i kushteve të motit pritet pas orës 10:00 të datës 23 nëntor 2022 dhe deri atëherë jAutoriteti do të jetë në monitorim të vazhdueshëm të situatës deri në rikthimin në normalitet.https://ata.gov.al/2022/11/22/anijet-e-peshkimit-ne-durres-nuk-lejohen-ne-det-deri-ne-permiresimin-e-motit/