E përditshmja britanike “The Mirror” e quan Shqipërinë si perlën e turizmit që po inkurajohet të vizitohet këtë verë nga influencuesit e TikTok. “Për turistët që nuk duan të shpenzojnë shumë para për pushime në Maldive, mund të shtojnë Shqipërinë në listën e destinacioneve të tyre të udhëtimeve, pasi ky vend i mrekullueshëm evropian ofron ujëra të pastra kristal dhe resorte mahnitëse, shkruan Ariane Sohrabi-Shiraz në një artikull të botuar në të përditshmen britanike “Mirror”.
Maldivet janë një ëndërr për shumë vizitorë, por akomodimi në resortet luksoze mund të jetë tepër i shtrenjtë. “The Mirror” e konsideron Shqipërinë një alternativë evropiane po aq tërheqëse, sa Maldivet. “Pushimet në Shqipërinë mahnitëse po fitojnë popullaritet vitet e fundit. Me plazhet e saj të mrekullueshme me rërë, limanet e fshehura dhe peizazhet mahnitëse, nuk është çudi që influencuesit e udhëtimeve po inkurajojnë turistët të vizitojnë Shqipërinë”, shkruan “The Mirror”, ndërsa artikulli përcjell përshtypjet e influencuesve të TikTok.
“Kjo pjesë e parajsës nuk gjendet në asnjë tjetër veçse në Ksamil, një fshat bregdetar në Rivierën Shqiptare që po fiton me shpejtësi një reputacion si “Maldivet e Evropës”. Videot e panumërta paraqesin turistë të bronztë që zhyten në ujërat e kaltra e të pastra kristal nën qiellin blu pa re – të ngjashme me Maldivet, por me çmime më të lira. Vizitorët mund të kënaqen me të gjitha argëtimet klasike tropikale, që nga zhytjet deri tek banjot e diellit dhe orët e pafundme të relaksit”, thuhet më tej në artikull, ku veçohen po ashtu edhe çmimet e ulëta.
