Presidentja e Komisionit Evropian Ursula von der Leyen, së bashku me presidentin qipriot Nikos Christodoulides, pritet të shpallin nga Libani një paketë mbështetëse me vlerë një miliard euro për përballjen e flukseve migratore. Në veçanti, qeveria qipriote së fundmi ngriti alarmin për numrin në rritje të refugjatëve sirianë që mbërrinin nga Libani, duke e konsideruar atë jo më të qëndrueshme dhe i bëri thirrje BE-së të veprojë. “Lidhjet midis Libanit dhe Evropës janë të thella dhe të forta. Presidenti Christodulides dhe unë jemi këtu për të thënë se BE-ja mbështet fuqishëm Libanin dhe popullin e tij. Dhe ne duam të forcojmë bashkëpunimin tonë të gjatë”, shkroi von der Leyen në X. BE synon të ndalojë fluksin e refugjatëve nga Siria që aktualisht jetojnë në Liban me ndihmë financiare prej rreth një miliard euro. ”Paratë e BE-së do të përdoren për të forcuar shërbimet shëndetësore, arsimore dhe sociale në Liban”, theksuan zyrtarët e BE-së. Fonde ndahen gjithashtu për autoritetet e sigurisë dhe forcat e armatosura të vendit, si dhe për luftën kundër bandave të trafikimit dhe për reformat ekonomike dhe financiare.
