Shumë pak raste të hepatitit janë duke u diagnostikuar dhe trajtuar në mbarë botën, me numrin e njerëzve që vdesin nga sëmundja virale që është rritur nga 1,1 milion në 2019 në 1,3 milion në 2022, deklaroi Organizata Botërore e Shëndetësisë (OBSH). Sipas OBSH-së, 83% e vdekjeve janë për shkak të hepatitit B dhe 17% nga hepatiti C. Ekzistojnë pesë lloje të ndryshme të hepatitit të shkaktuar nga viruse të ndryshme, nga A në E. Veçanërisht të rrezikshëm janë hepatiti B dhe C, të cilët janë ndër shkaktarët kryesorë të cirrozës dhe kancerit të mëlçisë dhe të cilëve u referohet kryesisht raporti i OBSH-së.
OBSH regjistroi një rënie të lehtë të infeksioneve të reja të hepatitit, nga 2,5 milionë në 2019 në 2,2 milionë në 2022, duke treguar se fushatat e vaksinimit dhe masat e tjera parandaluese po japin efekt. ”Sidoqoftë, 6 000 njerëz janë ende të infektuar çdo ditë”, theksoi organizata. Deri në fund të vitit 2022, vetëm 13% e të gjithë njerëzve me hepatit B kronik ishin diagnostikuar me sëmundjen dhe vetëm 3% kishin akses në terapi antivirale. Për hepatitin C, rreth një e treta e rasteve janë diagnostikuar dhe rreth një e pesta e të prekurve janë trajtuar.
