Vera në Shqipëri është e mahnitshme. Edhe pse nuk është një vend i festave latine, ka plazhe, klube ditore, laguna me rërë, pyje me pisha, rrënoja të lashta dhe male, shkruan James Booth në të përditshmen australiane “Escape”. Shqipëria, me nje vije bregdetare 450 kilometra, në jug të Kroacisë dhe në veriperëndim të Malit të Zi në detet Adriatik dhe Jon, po kthehet në një destinacion të ri turistik në Evropë. Jo vetëm që është më relaksuese se Ibiza por është edhe më lirë.
Në Shqipëri, ju mund të porosisni një vakt me tre pjata në një restorant mesatar, për dy persona për vetëm 35 euro. Gjithashtu, për një qëndrim katërditor për dy persona në korrik, mund të rezervoni një hotel për rreth 60 euro në natë. Shijoni vendpushimin si Pema e Thatë, e cila duket sikur ndodheni në Maldive me shezllonet mbi ujë. Shumë video në Instagram dhe TikTok u dedikohen udhëtarëve që promovojnë bukuritë e Shqipërisë. Tani udhëtarët kanë zbuluar këtë vizion të parajsës, i cili shumë shpejt do të bëhet më i shtrenjtë dhe i mbipopulluar. Ne ju rekomandojmë ta vizitoni tani ndërsa është ende nën radar. Porta kryesore për në Rivierën Shqiptare është nëpërmjet aeroportit Ndërkombëtar të Tiranës, i cili është dy orë me makinë nga Vlora, fillimi i kësaj shtrirje mahnitëse të vijës bregdetare.
