Ministria e Turizmit dhe Mjedisit po punon për hartimin e strategjisë së turizmit 2024-2030. Për hartimin e saj, ministrja e Turizmit dhe Mjedisit, Mirela Kumbaro kërkoi kontributin e qytetarëve për të marrë pjesë në pyetësorët që do të shërbejnë më pas për të pasur në dorë një platformë sa më gjithëpërfshirëse, koherente, që i prin tregut, orienton tendencat, përmbush e lehtëson marrëdhëniet mes aktorëve të sektorit publik e privat.
“Gjatë rrugës për krijimin e strategjisë së re të turizmit, së bashku me partnerët e GIZ Albania konsiderojmë të vyer çdo mendim dhe qasje për ta bërë më të prekshme, më eficiente dhe më afër standardeve drejt turizmit elitar, por gjithmonë të qëndrueshëm e në respekt me mjedisin”, theksoi Kumbaro.
Kumbaro u shpreh se “nga pyetësorët e deritanishëm me publikun, na rezulton se: 77 % mendojnë se zhvillimi i mëtejshëm i turizmit përmirëson cilësinë e jetesës së rezidentëve pranë zonave turistike dhe 90 % e konsiderojnë si shumë të rëndësishme përfshirjen e komuniteteve lokale në vendimmarrjet mbi zhvillimet në turizëm”. Kumbaro ftoi qytetarët të marrin pjesë në hartimin e strategjisë së turizmit shqiptar. Strategjia kombëtare e zhvillimit të turizmit 2024-2030 pritet të mbyllet në pranverën e këtij viti.
