Yulia Navalnaya, bashkëshortja e opozitarit të ndjerë rus, Alexei Navalny, ka bërë një apel publik ku denoncon se ”bashkëshorti i saj u vra nga presidenti Vladimir Putin” dhe njofton se ”do të vazhdojë punën e bashkëshortit i cili vdiq në burg të premten e kaluar”, sipas corriere.it. ”Unë do të vazhdoj punën e Alexei Navalny. Vazhdoni të luftoni për vendin tonë. Qëndroni pranë meje. Të ndajmë jo vetëm zinë dhe dhimbjen e pakufishme që na mbështjell, por edhe zemërimin tonë. Zemërim ndaj atyre që guxuan të vrasin të ardhmen tonë”, thuhet në mesazhin e publikuar në Instagram.
Navalnaya gjithashtu vuri në dukje se ajo e di “saktësisht pse Putini vrau Alexein” dhe se ndihmësit e saj do ta bëjnë të ditur në të ardhmen e afërt. E veja e kundërshtarit rus denoncoi vdekjen e të shoqit nga helmimi. Ajo akuzoi autoritetet ruse se kanë fshehur trupin e tij, duke pritur që gjurmët e agjentit nervor të zhduken nga kufoma. Yulia Navalnaya ishte sot në Bruksel për të takuar ministrat e Jashtëm të BE-së. Navalny ishte helmuar edhe më 20 gusht 2020 gjatë një udhëtimi në Siberi dhe mbështetësit e tij denoncuan përdorimin e Novichockut nga autoritetet ruse
