Studentët e Mjekësisë përmes një deklarate për mediet kërkojnë të jenë pjesë e grupeve të interesit në procesin rishikimit të ligjit për studentët e mjekësisë, duke iu referuar vendimit të dhënë të enjten nga Gjykata Kushtetuese. Gjykata Kushtetuese ka pranuar pjesërisht kërkesën e studentëve të Mjekësisë kundër ligjit që i detyron ata të punojnë 5 vite brenda vendit, përndryshe nuk marrin diplomën, duke kërkuar nga parlamenti rishikimin e ligjit. Studentët theksojnë se janë gati të dalin në protestë nëse kjo e drejtë e tyre, për të qenë pjesë e procesit të rishikimit të ligjit cenohet. “Ne jemi dakord me vendimin. Gjykata Kushtetuese i kërkoi qeverisë atë që ne i kemi kërkuar prej kohësh, që të na dëgjojnë dhe të konsultohemi. Por në këtë moment do ishte e drejtë të dëgjoheshin të gjitha palët e interesit. Ka qenë situatë e vështirë, por beteja nuk përfundon akoma”, bëhet me dije në deklaratën e studentëve të mjekësisë. “Po presim vendimin e arsyetuar. Të shohim se çfarë paraqet vendimi i përfunduar që më pas të dimë edhe ne sesi të veprojmë. Këmbëngulja dhe guximi ynë nuk do përfundojë, jemi gati të mbushim sheshet nëse e drejta jonë cenohet”, përfundon deklarata e studentëve.
