Ministri i Mbrojtjes, Niko Peleshi u shpreh sot krenar për partneritetin e fortë me SHBA në fushën e mbrojtjes, ndërsa theksoi se ekspertë amerikanë do mbështesin skuadrën e Forcës Ajrore për dy vite për të përmirësuar më tej kapacitetet tona. Peleshi ndau dëshminë e Nënkolonel Ervin Buzi, komandant i skuadronit të dytë operacional Black Hawk, i cili tregon kapacitetet e helikopterëve të rinj modernë me të cilët sapo u pajisën Forcat tona të Armatosura. “Trajnimet në Shtetet e Bashkuara kanë aftësuar Ervinin dhe efektivë të tjerë të Forcës Ajrore duke i përgatitur për të shfaqur vlerat dhe profesionalizmin e tyre”, tha ai. Buzi tregon se e ka filluar karrierën duke fluturuar me helikopterët AB-206 në Bazën Ajrore të Farkës dhe së fundi me helikopterin Black Hawk. Ai thekson se ky helikopter është shumë rolesh dhe si objektiv kryesore ka përmbushjen e objektivave ushtarake, por edhe detyra të tjera si kërkim-shpëtim, si dhe luftën kundër zjarreve. Buzi shprehet se për helikopterët Black Hawk është trajnuar në SHBA dhe një skuadër amerikane do t’i suportojë për dy vite.
