Presidentja e Komisionit Evropian Ursula von der Leyen ka mbështetur vendimin e komisionit për t’i dhënë fondet e BE-së Hungarisë gjatë një fjalimi sot në Parlamentin Evropian. “Budapesti ka miratuar legjislacionin për forcimin e pavarësisë së gjyqësorit në Hungari”, tha Von der Leyen përpara legjislativit të BE-së. “Kjo është ajo që ne kërkuam dhe ajo që Hungaria dha”, shtoi ajo. Në dhjetor, Komisioni Evropian livroi rreth 10 miliardë euro (10,9 miliardë dollarë) fonde të ngrira të BE-së për Hungarinë, pavarësisht akuzave të vazhdueshme për abuzim me pushtetin dhe korrupsion në vend. Fonde të tjera me vlerë pothuajse 12 miliardë euro dhe ndihma të tjera me vlerë miliarda euro për koronavirusin, mbeten ende të bllokuara. “Hungaria duhet të përmbushë të gjitha kushtet e nevojshme”, tha Von der Leyen. Një grup ligjvënësish të BE-së nga i gjithë spektri politik beson se nëse komisioni lëshon fonde të tjera për Hungarinë pa plotësuar kushtet, parlamenti do të përdorte të drejtën për të ndërmarrë veprime të mëtejshme politike dhe ligjore. Kjo mund të përfshijë një votë mosbesimi ndaj komisionit. Nëse është e suksesshme, mund të kërkohet dorëheqja e komisionit, përfshirë ajo e Von der Leyen. Një rezolutë mbi masat do të votohet nesër në Strasburg dhe megjithëse ka pak shanse për sukses, zemërimi po rritet në të gjithë dhomën. Von der Leyen, një politikane konservatore veterane gjermane, është akuzuar se ka lejuar veten të shantazhohet nga kryeministri hungarez Viktor Orbán, i cili më herët njoftoi se do të bllokonte një paketë të ndihmës së BE-së për Ukrainën nëse nuk do të liroheshin fondet nga blloku.
