Ushtria ukrainase raportoi sot se kishte shkatërruar një qendër komanduese ruse në aerodromin ”Saki”, në gadishullin e Krimesë, në një sulm me raketa gjatë natës. “Aerodromi Saki: të gjitha objektivat u goditën”, tha shefi i forcave ajrore ukrainase, Mykola Oleshchuk, sipas raporteve të medias lokale. Gjatë natës, Ministria ruse e Mbrojtjes tha se sistemet e saj të mbrojtjes ajrore kishin rrëzuar katër raketa ukrainase. Raportet nuk mund të verifikoheshin në mënyrë të pavarur. Që nga pushtimi i Ukrainës në shkurt 2022, forcat e Kievit kryen sulme të shpeshta ndaj objektivave ushtarake ruse në Krime, e cila u aneksua ilegalisht nga Moska në 2014. Objekti në ”Saki” bëri bujë në gusht të vitit të kaluar, kur raketat ukrainase shkatërruan disa avionë rusë të parkuar jashtë. Këtë shtator, Ukraina goditi selinë e flotës ruse të Detit të Zi në Sevastopol me raketa ”Storm Shadow” të furnizuara nga Perëndimi. Më 26 dhjetor, anija e madhe ”Novocherkassk” u fundos ndërsa ishte ankoruar në qytetin port.
